No hay etiquetas aún.
Toca melodía de despedida...
Ao longo deste intenso curso escolar, foron moitos os mestres/as que nos teñen falado do modelo finlandés. Finlandia semella ser o Silicon Valley educativo. Un escenario á vangarda, un espello no que todos queren mirarse.
Case todos os mestres non teñen explicado as principais características dese modelo, pero poucos son os que o teñen levado verdadeiramente á práctica. Sen dúbida, a materia de NOVAS TECNOLOXÍAS é un exemplo.
Nestes 4 meses:
Traballamos en equipo, pero equilibrando esa dinámica grupal con responsabilidades individuais.
Cada grupo de traballo tivo o seu proxecto diferenciado. Un proxecto propio, con pegada persoal que se foi construíndo dende unha idea orixinal ata a súa concreción final.
Sentimos que por enriba dos contidos, o que estabamos a traballar eran competencias.
Perdemos o medo ás novas tecnoloxías e descubrimos un mundo ilimitado e cheo de posibilidades.
Fixemos da motivación o noso principal combustible, ata o punto de non darnos conta de que lle estabamos dedicando a esta materia máis horas das que eran necesarias para aprobala. O pragmatismo deu paso á motivación intrínseca!.
Máis alá da temática de cada proxecto, todos os alumnos/ traballamos contidos transversais: expresión oral e escrita, comunicación audiovisual, manexo das TIC, emprendemento, traballo en equipo...
Fomos protagonistas da nosa propia aprendizaxe, de forma que o profesor converteuse nun mero facilitador, nunha estrutura de apoio, nun provedor de dinámicas de aprendizaxe.
En definitiva. Esta materia foi todo un descubrimento. Atrás queda a desconfianza das primeiras clases. Case unha alerxia tecnolóxica... que co tempo se transformou en interese e curiosidade.
O noso legado queda na rede. Un blog compartido, a nosa primeira web, un vídeo promocional, e múltiples recursos educativos para traballar a paixón pola lectura.
Hoxe son plenamente consciente da utilidade desta materia para o futuro laboral dos docentes. Por iso aproveito este foro para reivindicar a extensión desta materia a todos os cursos de Educación Primaria!
Graciñas a todos e a todas.
Adeus Finlandia!